Om Oppdag Sunnmøre
Oppdag Sunnmøre er ein del av eit masterprosjekt ved Høgskulen i Volda 2019, og er laga av Tone Solhaug og Synne Øye Myrvold. Vi ønskjer å vise fram leikeplassen vår, Sunnmørsalpane, og alle dei varierte og fantastiske opplevingane naturen her har å tilby.
Bli med og oppdag Sunnmøre med oss!
Oppdag Sunnmøre er ei ny nettside, og vi er ute etter fleire som kan bidra med innhald. Er du glad i å skrive og fotografere/filme, og ynskjer å bidra med eit innlegg eller fleire? Ta kontakt med oss på oppdagsunnmore@gmail.com!
Sporlaus ferdsel
Vi i Oppdag Sunnmøre er opptekne av å bevare den vakre naturen vår. For oss er Sunnmøre den “skjulte perla” med eit enormt potensiale – om vi tek vare på naturen. Sunnmøre skal vere eit attraktivt reisemål, også i framtida. Då må alle bidra litt, så vi kan nyte den urørte naturen saman.
Rotsethornet. | Foto Tone Solhaug.
Tips til eit meir berekraftig friluftsliv
- Ta alltid med deg søppelet ditt heim.
- Sjølv om matavfall som epleskrottar, bananskal og appelsinskal vert brote ned i naturen, så tek det tid. Putt det i sekken og ta det med deg heim.
- Dersom det er mogleg, lån utstyr du ikkje vil kome til å bruke så ofte med andre.
- Lån ut ditt eige utstyr til andre.
- Kjøp brukt utstyr. Bra både for miljøet og lommeboka.
- Kjøp klede av varige, naturlege og miljøvennlege materiale der det er mogleg. Ull er gull.
- Reis i lag dersom fleire skal på tur.
- Vel tog og buss framfor fly.
- Nytt deg av dei fantastiske turmoglegheitene vi har her i Noreg framfor å reise til andre land for å gjere det same.
- Vi anbefaler ein tur til Sunnmøre!
